Ekrani është bilbordi digjital i SuperShpejtit. Çdo spot luan vetë, para çdo vizitori, nën logon tonë — prandaj çdo spot shqyrtohet nga stafi para se të dalë, dhe shqyrtimi bëhet duke e parë videon deri në fund.
Çdo reklamë shfaqet gjithmonë me shenjën «Reklamë», e dukshme dhe e pambyllshme. Kjo nuk negociohet: është kërkesë ligjore ndaj konsumatorit dhe e vetmja gjë që e ndan një platformë të besueshme nga një faqe e pistë.
01Çfarë nuk pranohet
- Bixhoz, basta dhe lojëra fati.
- Kredi të shpejta, «fitim i garantuar», skema investimi, kripto dhe forex.
- Pretendime shëndetësore — kura, mjekime, suplemente që premtojnë rezultate.
- Produkte për të rritur dhe përmbajtje seksuale.
- Alkool i drejtuar te të mitur, ose i paraqitur si zgjidhje problemi.
- Përmbajtje politike gjatë fushatës zgjedhore.
- Imitim marke: logo, emra ose pamje që lënë të kuptohet se je dikush tjetër.
- Çdo gjë që pulson më shpejt se tri herë në sekondë.
Spotet me të folur duhen dorëzuar me titra të ngulitura në video. Zëri nuk niset kurrë vetë — vizitori e ndez nëse do.
02Specifikimi i skedarit
MP4, H.264 (High/Main, 8-bit, yuv420p), audio AAC ose pa audio, 1920×1080 ose 1280×720, raport 16:9, deri 15 sekonda, deri 2,5 Mbps, deri 8 MB.
Skedarët që nuk i plotësojnë këto kushte refuzohen me udhëzim se çfarë të ndryshosh te eksporti. Nuk i përpunojmë vetë: një video e ri-kompresuar nga ne nuk do të ishte më ajo që aprovove ti.
03Shqyrtimi dhe heqja
Dorëzimi
Na dërgon skedarin dhe lidhjen ku duhet të çojë klikimi. Lidhja duhet të jetë https.Shqyrtimi
Stafi e sheh spotin deri në fund brenda dy ditëve të punës. Nëse refuzohet, merr arsyen me shkrim.Publikimi
Spoti nis të luajë në datën e rezervuar dhe merr njoftim kur del në ajër.
Një reklamë e aprovuar mund të ndalet menjëherë nëse del se shkel këto rregulla, nëse lidhja çon diku tjetër nga ç'u aprovua, ose nëse destinacioni bëhet i pasigurt. Në ato raste ndalimi bëhet pa rimbursim, dhe arsyeja të njoftohet.
Nëse e ndalim ne për një arsye që nuk të përket — një gabim yni, një ndërprerje teknike — ditët e humbura shtohen te fundi i periudhës.
04Çfarë matim, dhe çfarë nuk matim
Numërojmë një shfaqje kur skeda është e dukshme, të paktën gjysma e kornizës ka qenë në ekran për një sekondë të plotë, dhe videoja ka luajtur vërtet të paktën dy sekonda. Matim edhe sa larg shkon luajtja dhe sa klikime vijnë.
Te reklama që del gjatë shfletimit kushti i gjysmës plotësohet nga vetë forma — ajo mbulon faqen — ndaj aty vlejnë tri të tjerat: skeda e dukshme, një sekondë e pandërprerë dhe dy sekonda luajtje. Një reklamë e mbyllur para se spoti të nisë mirë nuk numërohet dhe nuk faturohet. Po ashtu, i njëjti vizitor numërohet një herë për orë për çdo sipërfaqe: tetë faqe me atë reklamë brenda një ore janë një shfaqje, jo tetë.
Ekrani nuk mban profile vizitorësh, nuk të ndjek nëpër faqe të tjera dhe nuk të jep listë njerëzish. Te ana jonë vizitori identifikohet vetëm si një hash i përkohshëm i adresës IP, që ndërron çdo javë dhe nuk kthehet dot mbrapsht. Te ana e tij shkruhen dy gjëra, dhe asnjëra nuk vjen te ne: numëruesi që e mban të rrallë reklamën gjatë shfletimit — sa faqe ka kaluar, kur u hap së fundi, sa herë sot — dhe kodet e reklamave që ai i ka mbyllur vetë, të cilat nuk i dalin më për 24 orë. Ato kode identifikojnë REKLAMËN, kurrë vizitorin. Targetimi bëhet sipas faqes, kurrë sipas personit. Spoti nuk kufizohet sipas kategorisë: te faqja e Ekranit, te mënyra TV dhe — kur është e ndezur — te reklama që del gjatë shfletimit luan çdo rezervim aktiv.