Kushtet e përdorimit

Shpallje

Njoftimi që publikon ti për një send, një pronë, një shërbim ose një vend pune, me foto, çmim dhe përshkrim.

Llogari e verifikuar

Llogari që ka kaluar verifikimin e identitetit me dokument. Publikon pa pritur aprovim dhe ka kufij më të lartë përdorimi.

Llogari biznesi

Llogari që ka aplikuar si biznes i regjistruar dhe ka marrë aprovimin e stafit. Ka vitrinë publike dhe kufijtë më të lartë. Verifikimi i identitetit është aplikim më vete — një biznes mund të mos jetë i verifikuar.

Paketë

Shërbim me pagesë që e ngre një shpallje në renditje dhe e shpërndan më gjerë për një afat të caktuar (Premium ose Ultra).

Ekrani

Bilbordi digjital i SuperShpejtit: hapësira ku luajnë reklama video të rezervuara me plan, para çdo vizitori, të shënuara gjithmonë si «Reklamë».

Kërkesë

Njoftim privat «po kërkoj» që e shkruan ti, dhe që platforma e krahason vetë me shpalljet e reja.

Vërejtje

Shënim zyrtar me arsye që stafi ia vë një llogarie për një shkelje. 3 të tilla brenda 180 ditësh e bllokojnë llogarinë.

Stafi

Administratorët dhe moderatorët e platformës. Çdo veprim i tyre shënohet në një regjistër që nuk fshihet.

• Duhet të jesh të paktën 18 vjeç ose të kesh pëlqimin e prindit/kujdestarit.
• Të dhënat që jep duhet të jenë të sakta dhe të përditësuara.
• Je përgjegjës për mjetin me të cilin hyn — fjalëkalimin tënd, ose llogarinë e Google-it a të Facebook-ut nëse hyn me to — dhe për çdo veprim të kryer nga llogaria jote.
• Nëse hap llogari me Google ose Facebook, te ne nuk ke fjalëkalim — dhe kush e humbet atë llogari, humbet edhe këtë. Prandaj, sa je brenda, cakto një fjalëkalim me «E harrove fjalëkalimin?» te faqja e hyrjes: llogaria vazhdon të hapet me ofruesin, thjesht fiton edhe një mënyrë të dytë hyrjeje.
• Një person mban një llogari; llogaritë e shumëfishta për të anashkaluar kufizime nuk lejohen.

Llogarinë e hap me email dhe fjalëkalim, me Google, me Facebook, ose me lidhjen që të vjen me email kur shpall si vizitor — edhe kjo e fundit është llogari e vërtetë, pa fjalëkalim. Regjistrimi me email kërkon konfirmimin e adresës; me Google ose Facebook adresa vjen e konfirmuar nga ofruesi.

Format e hyrjes dhe të regjistrimit mbrohen nga një kontroll kundër botëve. Kufizimet e mëposhtme — kuotat, ftohja e emrit, dritarja e vlerësimeve, tavani i Kërkesave — vlejnë për person, jo për llogari: prandaj llogaria e dytë nuk lejohet.

Pranimi i këtyre kushteve bëhet me kutinë e regjistrimit, kur hyn me Google a Facebook duke vazhduar pas fjalisë «Duke vazhduar pranon Kushtet e përdorimit dhe Politikën e privatësisë», ose, kur shpall si vizitor, duke kërkuar lidhjen e verifikimit.

Emri i përdoruesit ka 3 deri 24 shenja: shkronja të vogla latine, shifra, pikë dhe nënvizë. Fjalët e rezervuara — emrat e stafit, marka dhe marka e vjetër, edhe të shkruara me shifra a ndarës — refuzohen.

Emri ndërrohet, por ngadalë me qëllim: ndërrimi i parë brenda vitit është i lirë, çdo ndërrim tjetër pret 7 ditë më shumë se i mëparshmi, dhe brenda 365 ditësh lejohen deri 5. Kjo e ndal atë që ndërron emrin, mashtron dhe e ndërron sërish brenda ditës.

• Emri që e lëshon dikush tjetër mbetet i zënë 90 ditë, që askush të mos e marrë emrin e një shitësi të njohur ditën pasi ai e ndërroi. Kthimi te emri yt i mëparshëm lejohet vetëm kur ndërrimin e bëre vetë.
• Stafi mund ta ndryshojë emrin e kujtdo për të ndalur imitimin e një personi a biznesi. Ndërrimet e stafit nuk të numërohen ty.
• Telefoni i profilit ruhet në format ndërkombëtar dhe nuk shfaqet te profili publik. Te një shpallje del vetëm numri që shkruan ti aty, dhe mund ta fshehësh me opsionin e formës — atëherë blerësi të shkruan në bisedë. Adresa e emailit nuk shfaqet kurrë.

Përmbajtja mbetet e jotja. Duke e publikuar, na jep një licencë jo-ekskluzive për ta shfaqur dhe shpërndarë brenda platformës dhe në materialet promovuese të saj. Ti garanton se ke të drejtë ta publikosh atë përmbajtje.

Kur blen vetë një paketë, e njëjta licencë shtrihet edhe jashtë platformës për afatin e saj: shpallja publikohet në faqet e SuperShpejtit në rrjetet sociale dhe, me Ultra, edhe si reklamë me pagesë në Facebook.

Vlerësimi që i lë një personi tjetër është fjalë publike mbi të: mbetet i lexueshëm edhe pasi kalon dritarja e redaktimit, dhe bie vetëm kur mbyllet llogaria e njërës anë ose kur e heq stafi për shkelje të rregullave të vlerësimeve.

Shpalljet duhet të respektojnë rregullat e publikimit. Ne mund të heqim përmbajtje ose të pezullojmë llogari që i shkelin ato.

Pezullimi ka një formë të vetme, të përshkruar te neni «Vërejtjet dhe bllokimi»: vërejtje me arsye, dhe bllokim kur ato grumbullohen ose kur shkelja është e rëndë. Çfarë lejohet dhe çfarë jo e thonë rregullat e shpalljeve.

Një shpallje mban deri 12 foto; çdo skedar deri 15 MB. Fotot ripërpunohen në shfletuesin tënd para ngarkimit, ndaj te ne mbërrin vetëm imazhi i ri, jo skedari origjinal me të dhënat e tij.

• Stafi mund ta ndreqë vetë një shpallje — kategorinë, titullin, një fjali — dhe ti njoftohesh për çdo ndryshim të tillë. Refuzimi vjen gjithmonë me njoftim, dhe me arsyen kur stafi e ka shkruar; sa kohë shpallja mban ende shenjën e atij refuzimi, riaktivizimi i saj rikalon nga shqyrtimi.
• Shpallja nuk hiqet vetvetiu. Pas 60 ditësh pa u konfirmuar merr shenjën «E skaduar» dhe blerësi e sheh; mbetet e listuar. «Rifresko» ose një ndryshim e rinis afatin.
• Fshirja e përhershme e një shpalljeje merr me vete edhe bisedat e saj, për të dyja palët. Arkivimi jo: shpallja del nga publiku dhe gjithçka tjetër mbetet.
• Një shpallje që ka marrë vlerësime nuk fshihet dot, që reputacioni të mos pastrohet me një klikim; arkivoje.

• Një mesazh mban deri 4000 shenja. Fotot në mesazhe ende nuk ofrohen; vendndodhja dërgohet vetëm pasi e konfirmon ti.
• Fshirja e një bisede dhe bllokimi i një përdoruesi nga ana jote ende nuk ofrohen. Kur dikush të shqetëson, raportoje — stafi vepron mbi llogarinë e tij.
• Bisedën e lexojnë vetëm dy pjesëmarrësit. Stafi lexon vetëm bisedën që citohet nga një raportim i hapur, dhe çdo lexim i tillë lë gjurmë auditimi.

Kërkesat janë private: teksti i tyre nuk i shfaqet askujt, nuk ushqen «Në trend» dhe as reklamat. Jashtë llogarisë tënde del vetëm një numër i grumbulluar «sa persona kërkojnë diçka të ngjashme», dhe vetëm kur pas tij qëndrojnë disa persona të ndryshëm. Mban deri 10 kërkesa aktive; pas 60 ditësh pa përputhje kërkesa hesht, dhe ti e fshin kurdo.

Vlerëson vetëm një llogari me identitet të verifikuar — edhe kur është biznes — dhe vetëm një person me të cilin ke shkëmbyer mesazhe në të dyja drejtimet përmes platformës. Për të njëjtin person mund të lësh një vlerësim çdo 6 muaj; kjo dritare numërohet nga një regjistër që nuk zbritet as kur vlerësimi hiqet.

Mesatarja e yjeve shfaqet vetëm nga 3 vlerësime e lart; me më pak shfaqet vetëm numri i tyre. Në ditë lejohen 10 vlerësime, dhe jo më shumë se 3 brenda një ore.

Stafi mund ta heqë një vlerësim që shkel rregullat; arsyen e merr autori me njoftim. Vlerësimi i hequr nuk numërohet më dhe nuk shfaqet publikisht, por autori dhe personi i vlerësuar e shohin ende — përveç kur vetë teksti është dëmi (numër telefoni, adresë, dokument): atëherë fshihet krejt.

Kufijtë më poshtë ekzistojnë kundër spam-it dhe skripteve, jo kundër përdoruesit të zakonshëm — shumica nuk i prek kurrë. Numërohen brenda 24 orëve të fundit, sipas llojit të llogarisë. Mund të ndryshojnë; vlen gjithmonë tabela e kësaj faqeje.

• Veç kuotës ditore ka kufij shpërthimi: 15 biseda të reja brenda një ore, 30 mesazhe brenda një minute, 3 vlerësime brenda një ore.
• Kufiri numëron sa herë krijove, jo sa ke: fshirja e asaj që sapo krijove nuk e liron vendin.
• Fshirja dhe tërheqja nuk kufizohen kurrë: heqja nga të preferuarat, çndjekja e një biznesi, fshirja e shpalljes a e kërkesës sate.
• Kur një kufi mbushet, veprimi refuzohet me një mesazh që thotë sa duhet të presësh — minuta, orë, ose deri nesër.

Një paketë e ngre shpalljen tënde në renditje dhe e shpërndan më gjerë për një afat të caktuar. Garanton dukshmërinë — renditjen dhe shikimet — jo shitjen: çmimi, fotot dhe përgjigjet e shpejta mbeten puna jote. Çmimi llogaritet në server dhe është ai që sheh te faqja e paketave në çastin e porosisë.

1. 1

   Zgjedh paketën

   Porosia krijohet me statusin «Në pritje». Deri këtu nuk ke asnjë detyrim: një porosi në pritje nuk është faturë.
2. 2

   Paguan me suportin

   Pagesa online ende nuk është aktive. Te «Porositë» shtyp «Paguaj» dhe hapet një tiketë e parambushur, ku suporti të tregon mënyrat e pagesës.
3. 3

   Aktivizohet

   Sapo stafi e konfirmon pagesën, porosia shënohet «E paguar» dhe promovimi nis; afati numërohet prej atij çasti.

• Asgjë nuk rinovohet vetë dhe nuk ka kontratë: kur mbaron afati, shpallja kthehet në pamjen e zakonshme dhe nuk të hiqet asnjë cent.
• Një porosi «Në pritje» e anulon vetë kurdo. Pasi shënohet «E paguar», çdo ndryshim ose anulim kalon nga suporti.
• Për të njëjtën shpallje dhe të njëjtin nivel nuk hapet porosi e dytë sa ka një në pritje; një Premium dhe një Ultra në pritje bashkë lejohen, por paguhen të dyja dhe vlen vetëm më i larti.
• Premium-i publikohet në rrjetet sociale të SuperShpejtit 1 herë në javë dhe 4 herë në muaj; Ultra shton reklamën me pagesë në Facebook me ≈ 35 000 shikime të targetuara për javë.

Plani «Sipas masës» përbëhet nga shërbime që i zgjedh vetë — fotografi profesionale, video me dron, Ultra e shumëfishuar, influencerë, spot te Ekrani, email, njoftim ose SMS te përdoruesit. Ai nuk ka çmim fiks dhe nuk krijon porosi: kërkesa dërgohet si tiketë suporti, suporti të kontakton në orarin që ke lënë, dhe puna nis vetëm pasi të keni rënë dakord për shërbimet dhe çmimin. Deri atëherë kërkesa nuk është as porosi, as faturë, dhe nuk sjell asnjë detyrim.

Ekrani është bilbordi digjital i SuperShpejtit. Rezervon një plan sipas kohëzgjatjes, dorëzon vetë spotin, dhe ai luan në rrotacion para çdo vizitori — te faqja e Ekranit, te mënyra TV dhe, kur është e ndezur, te reklama që del gjatë shfletimit. Reklamat zgjidhen sipas faqes ku dalin, kurrë sipas personit që po e lexon.

1. 1

   Dorëzon spotin

   Skedari duhet t'i përmbahet specifikimit: MP4, H.264 (High/Main, 8-bit, yuv420p), audio AAC ose pa audio, 1920×1080 ose 1280×720, raport 16:9, deri 15 sekonda, deri 2,5 Mbps, deri 8 MB. Pesëmbëdhjetë sekondat e specifikimit janë rekomandim; kufiri i fortë i gjatësisë është 3–20 sekonda dhe 8 MB; skedarët jashtë tij refuzohen, nuk ripërpunohen.
2. 2

   Stafi e shqyrton

   E sheh videon deri në fund; refuzimi vjen me arsye.
3. 3

   Të vjen fatura

   Kur rezervimi është gati, të vjen njoftim dhe email me shumën.
4. 4

   Paguan te paneli

   Butoni i pagesës del vetëm te paneli yt, kurrë brenda një emaili. Rezervimi bëhet aktiv pasi stafi e konfirmon pagesën.

Çdo reklamë mban shenjën «Reklamë», të dukshme dhe të pambyllshme; zëri nuk niset vetë. Çfarë matet si shfaqje dhe çfarë jo e thonë rregullat e reklamave, që janë pjesë e këtyre kushteve.

Shkelja e rregullave sjell një vërejtje me arsye dhe një njoftim. Arsyet e mundshme:

• Spam ose shpallje të përsëritura
• Mashtrim
• Produkt i ndaluar
• Çmim ose përshkrim i rremë
• Përmbajtje ofenduese
• Kontakt abuziv me përdoruesit
• Shpallje dublikate
• Vlerësim i rremë ose i shkëmbyer
• Tjetër

3 vërejtje aktive brenda 180 ditësh e bllokojnë llogarinë vetvetiu, në të njëjtin çast me vërejtjen e fundit. Për raste të rënda stafi bllokon edhe drejtpërdrejt. Një vërejtje nuk fshihet, vetëm revokohet; bie bashkë me llogarinë.

Bllokimi i arkivon shpalljet aktive, ato në pritje dhe ato të shitura — nuk fshin asgjë. Hyrja në llogari nuk mbyllet, pikërisht që ta lexosh arsyen dhe të ankohesh.

• Shfleton çdo shpallje.
• Lexon bisedat e vjetra dhe i shënon si të lexuara.
• Lexon njoftimet dhe vërejtjet — aty është arsyeja.
• Heq nga të preferuarat, çndjek biznese, fshin kërkime e kërkesa.
• Sheh dhe fshin shpalljet e tua, përveç atyre që kanë marrë vlerësime.
• Hap një tiketë te suporti dhe i përgjigjesh asaj.
• Nuk publikon, nuk ndryshon, nuk arkivon dhe nuk shënon si të shitur asnjë shpallje.
• Nuk hap biseda të reja dhe nuk shkruan mesazhe.
• Nuk ruan te të preferuarat, nuk ruan kërkime, nuk shton kërkesa dhe nuk ndjek biznese.
• Nuk raporton, nuk vlerëson dhe nuk i përgjigjesh një vlerësimi.
• Nuk ndryshon asgjë te profili — as emrin, as foton, as kontaktet.
• Nuk ngarkon asnjë skedar: foto shpalljeje, logo biznesi, dokument a spot.
• Nuk blen paketa dhe nuk dërgon aplikime për verifikim, biznes a reklamë.

1. 1

   Hap një tiketë

   Shpjego çfarë ndodhi. Stafi e rishikon secilën vërejtje veç e veç.
2. 2

   Vërejtja e gabuar revokohet

   Nëse pas revokimit mbeten më pak se 3 vërejtje aktive, bllokimi automatik bie vetvetiu. Bllokimin e vendosur drejtpërdrejt nga stafi e heq vetëm stafi.
3. 3

   Shpalljet kthehen

   Shpalljet e arkivuara me bllokimin nuk kthehen vetvetiu: i riaktivizon ti te «Shpalljet e mia», ose i kthen stafi bashkë me heqjen e bllokimit. Llogaritë e zakonshme rikalojnë nga shqyrtimi.

Çdo shpallje dhe çdo vlerësim raportohet me një nga arsyet e dhëna (7 për shpalljet, 7 për vlerësimet), deri 10 raportime në ditë. Raportuesi njoftohet se raportimi u shqyrtua — jo për vendimin dhe jo për moderatorin. Raportimet e sajuara ose të përsëritura mund të sjellin vërejtje.

Për shkelje që përbëjnë vepër penale, bashkëpunojmë me autoritetet kompetente kur na kërkohet ligjërisht.

Stafi janë administratorët dhe moderatorët. Çdo veprim i tyre — aprovim, refuzim, arkivim, ndreqje, vërejtje, bllokim, ndryshim roli a verifikimi, hyrje në një llogari — shënohet në një regjistër që asnjë sesion klienti nuk e lexon dhe nuk e fshin, as ai i vetë stafit.

Një administrator mund të hyjë përkohësisht në llogarinë tënde vetëm për mbështetje, moderim ose një problem teknik. Hyrja e tillë zgjat më së shumti 4 orë, regjistrohet me emër, nuk bëhet mbi llogari stafi dhe nuk zinxhirohet nga një llogari te tjetra.

Stafi nuk i lexon bisedat e tua. Përjashtimi i vetëm është biseda që citohet nga një raportim i hapur, dhe leximi i saj lë rresht auditimi para se të shfaqet teksti.

1. 1

   E kërkon me tiketë

   Nuk ka buton vetëshërbimi, sepse fshirja merr me vete shpalljet, bisedat dhe të preferuarat e lidhura me llogarinë — dhe ato nuk kthehen.
2. 2

   Stafi e kryen

   Llogaria dhe shpalljet e saj hiqen; bisedat bien për të dyja palët; vlerësimet që ke dhënë dhe që ke marrë hiqen bashkë me llogarinë.
3. 3

   Të dhënat fshihen

   Të dhënat e mbetura hiqen brenda 30 ditësh, përveç rasteve kur ligji kërkon ruajtje më të gjatë. Detajet — çfarë ruhet, sa gjatë dhe pse — i thotë politika e privatësisë.

Të dhënat u jepen autoriteteve vetëm kur na kërkohet ligjërisht.

Shërbimi ofrohet «siç është». Në masën e lejuar nga ligji, nuk mbajmë përgjegjësi për dëme që rrjedhin nga marrëveshjet mes përdoruesve, nga ndërprerjet e shërbimit ose nga humbja e të dhënave.

Platforma mund të vihet përkohësisht në mirëmbajtje. Nuk garantojmë disponueshmëri të pandërprerë.

Kërkimi me AI dhe vlerësimi i çmimit me AI japin një përfundim automatik mbi fotot, tekstin dhe çmimet e gjetura. Ai nuk është ofertë, garanci as këshillë; vendimin e merr ti. Kanë kuotë ditore dhe një tavan të përbashkët kostoje, pas të cilit ndalen deri nesër.

Këto kushte mund të përditësohen. Për ndryshime thelbësore njoftojmë paraprakisht përmes platformës. Përdorimi i vazhduar pas hyrjes në fuqi nënkupton pranimin e tyre.

Njoftimi vjen si lajmërim brenda platformës, te njoftimet e llogarisë sate. Data në krye të faqes tregon versionin që vlen.